السلام عليكم ورحمة الله وبركاته...
من ملعب سان مارينو... اووووووووه هاي وين رحت عبالي اكو لعبة
اليوم اني راح اقدملجن اكله كلش مشهورة وحتى ما تكولن بس النسوان يعرفن يطبخن .. تره احنا الزلم كلشي نعرف بس نغلس مرات ...
المهم ... الاكله هذي موجودة بكل دول العالم وهي معروفة لكن مع الاسف الاكثرية ما يعرف يطبخهه بالطريقة الصحيحة
لكن اني اليوم راح اعلمجن سيداتي الطبخ على اصوله
اني ما راح اكول شسمهه الاكله انتو راح تحزرن طبعا يرادلهه شوي ذكاء وتركيز
يلله راح انبلش :
اولا يجب ان نغسل ايدينا بالماي والصابون لمنع التلوث
ملاحظة: انا اتكلم الفصحى
نحضر راسين بطيطة (ادري بيجن تسمنهه بتيته وهذه التسمية خطأ) نقشرهم زين وبعدين نقصص البطيطة على شكل شرائح صغيرة او كبيرة حسب الطلب (في هذه الاثناء نحضر الطاوة ويجب ان تكون خالية من آثار البيتنجان . يعني مو تكلن بيتنجان وتجن فوك الدهن تخلن البطيطة)
نضغ الدهن في الطاوة ونتركه حتى يحترك ، وقبل ان تدخن نضع البطيطة في الطاوة مع الحذر لان الدهن تره ما يتفاهم (خاصة اذا جان مال الحصة التموينية)
لاحظي عزيزتي الصورة ادناه
ملاحظة/ اضغطن على الصورة حتى تكبر
يفضل وضع البطيطة بكميات قليلة للمحافظة على الجودة والنوعية (مو تجيبن وتكومن بالطاوة ) وذلك لكي كلهه تستوي سوية وطبعا اكثر النساء تخلي كومة بالطاوة وهذا اكبر خطأ
لان قسم راح يستوي وقسم بعده ما مستوي وتظلن تكلبن بيهن والدهن يطفر على ايديجن وتطفر روحجن وخاصة اذا الكهرباء طافية وما تكدرن تحجن (بس تكولن بقلبجن "تاكلون زقوم " وتظلن تدعن علينه)
طبعا هنا اكو ملاحظة كلش مهمة الا وهي : مو تعوفن البطيطة على النار وتروحن ركض على التلفزيون لو متابعة برنامج لو على الانترنيت ، تره ترجعن تلكن الثعواله واصله للجيران ... هاي الاشياء تصير بأرقى العوائل .
المهم شكل البطيطة عندما تستوي بشكل جيد يصبح بالشكل التالي
نفس الملاحظة ام تكبير الصورة
طبعا اول ما تطلع البطيطة من الطاوة (يعني بعدهه بدهنهه) ينرش عليهه ملح كثير او قليل حسب الرغبة
نصيحة / خلن هواي ملح بلكي يغزر !!
واخيرا يصبح الطبق جاهز . وكما يمكن اكل هذه الوجبه مع الكيتشاب او الطرشي مع رغيف خبز لكن يمكن ايضا اكله بدون خبز (بالجطل مو عبالكم تشريب).
الملاحظة لا تنسنهه
وهذي صورة الطرشي
والف عافية ابوية.
ملاحظة / آسف لان بالاخير شوية كمت احجي شعبي ، شوي الفصحى تعبتني.
